कोरफड
फिरुनि फुलला घरात माझ्या दांडा कोरफडीचा
उमलोत्सव मग सुरू होऊदे त्याच्या सोनकळींचा।।१।।
नारिंगी अन लांबसडक ती फुले लगडतीं त्यास
कुठूनि येई गंध तयांचा छोट्या पक्ष्यांस।।२।।
रोज उमलती फुले तयाची खालोनि वर वर
विविधरंगी ते सूर्यपक्षी मग धरती अविरत फेर।।३।।
बाकदार ती चोच कशी मग शोषी मकरंदास
उलटे होऊनि कसरती करती नाना प्रयास।।४।।
मला पर्वणी उभा घेऊनि हाती कॅमेऱ्यास
पक्ष्यांना परि न दिसे मी तो राही आडोश्यास।।५।।
खेळ सुरू हा उन्हात रोजचि अर्धा श्रावण मास
अखेर संपति फुले सगळि ती आला तो दिवस।।६।।
उदास भलते वाटू लागे माझीया मनास
पुढच्या श्रावणमासाचि मग लागे डोळ्यां आस।।७।।
~ अमित कालेकर, 7 ऑक्टोबर 2021
(Do like and comment!)
